Maidir le Gaelturas

Is eagraíocht Ghaeilge é Gaelturas a eagraíonn laethanta saoire teanga agus cultúir do dhaoine fásta. Tá muid lonnaithe i nGaoth Dobhair, Dún na nGall. Tá Gaelturas díograiseach dúthrachtach fá na traidisiúin teanga agus cultúir atá i nGaeltacht an Iarthuaiscirt.

Tá sé d’aidhm againn tusa an foghlaimeoir a chur i lár an traidisiúin sin agus tú ar chúrsa seachtaine. Cuirfimid teanga bhríomhar agus cultúr saibhir atá sa cheantar leis na mílte bliain i do láthair i gcúrsa foghlama taitneamhach dlúthchairdiúil. Beidh teanga agus cultúr an cheantair á fhoghlaim agat ó dhaoine áitiúla atá ar maos sa traidisiún ársa seo.

Beidh muid do do threorú ar chasáin neamhghnátha trí áilleacht agus stair iontach na coda seo de Thír Chonaill agus beidh tú ag glacadh páirte i dtraidisiún beo na teanga agus an chultúir le seisiúin ceoil, coirmeacha ceoil, céilithe agus craic i rith na tráthnóntaí samhraidh.